Baladweyne, (insidesomalia.org)- Wararka laga helayo Degmada Baladweyne ee Gobolka Hiiraan ayaa sheegaya in ciidamo cusub oo ka tirsan kuwa Itoobiya ay gaareen degmadaas, kuwaasoo wata gaadiid dagaal.

Ciidamadaan ayaa waxay aroortii shalay kasoo dhaqaaqeen Degmada Feerfeer oo ku taala xadka u dhexeeyay labada dal ee Soomaaliya iyo Itoobiya, iyagoo wada sida la sheegay saanado Ciidan iyo sahay isugu jira cunno iyo shidaal.

Qaar ka mid ah dadka Degamda Baladweyne ayaa waxay sheegeen in xalay saqdii dhexe ay Ciidamadaan mareen gudaha Baladweyne, iyadoo qaarkood ay lugeynayaan, halka kuwa kalena ay gaadiid saarnaayeen.

Ma jirin wax iskahorimaadyo ah oo dhexmaray Ciidamada Itoobiya iyo kooxaha diiddan joogitaankooda, waxaana Maxkamaduhu ay shalay isaga baxeen gudaha Baladweyne, kaddib markii ay wada hadaleen iyaga iyo Odayaasha Gobolkaas.

Dhanka kale, waxaa lagu garaacay buurta Janta kundishe ee ay kaga sugan yihiin Ciidamada Itoobiya Degmada Baladweyne Madaafiic hoobiyeyaal ah, iyadoo ay diideen Maxkamaduhu in ay ka dambeeyeen.

Sheekh Xuseen Gaagaale oo u hadlay Maxkamadaha wuxuu sheegay inaysan iyagu ka dambeyn duqeyntaas, balse ay Ciidamadaas tuurayeen Madaafiic aad u xooggan, ayna ka warheleen in ay u soo socdaan sahay iyo saanado kala duwan.

Ciidamo Itoobiyaan ah oo kale ayaa la xusay in ay ku wajahan yihiin Baladweyne, halka wararka qaarkood ay sheegayaan in Ciidamadaas qaarkood ay ku socdaan Degmada Jowhar ee xarunta Shabeellada dhexe.